‘പെപ്പെ മാജിക്’; കുറക്കാവോയെ വീഴ്ത്തി ഐവറി കോസ്റ്റ് ചരിത്രത്തിലാദ്യമായി ലോകകപ്പ് നോക്കൗട്ടിൽ

മത്സരം തുടങ്ങി ആദ്യ മിനിറ്റുകളിൽ തന്നെ ഇരുടീമുകളും ആക്രമണ ഫുട്ബോളാണ് പുറത്തെടുത്തത്. ഒന്നാം മിനിറ്റിൽ തന്നെ കുറക്കാവോയുടെ സൂപ്പർ താരം താഹിത് ചോങ് തൊടുത്ത മാരകമായ ലോങ് റേഞ്ചർ ഷോട്ട് ഐവറി കോസ്റ്റ് ഗോൾകീപ്പർ യഹിയ ഫൊഫാന തട്ടിയകറ്റി.

എന്നാൽ കളിയുടെ ഏഴാം മിനിറ്റിൽ തന്നെ ഐവറി കോസ്റ്റ് ആദ്യ ലീഡെടുത്തു. 19 കാരനായ യുവതാരം യാൻ ഡിയോമാൻഡെ നൽകിയ മികച്ചൊരു അസിസ്റ്റിൽ നിന്ന് നിക്കോളാസ് പെപ്പെ പന്ത് വലയിലാക്കുകയായിരുന്നു. വാർ പരിശോധനയ്ക്ക് ശേഷമാണ് റെഫറി ഗോൾ അനുവദിച്ചത്. ഗോൾ നേടിയതോടെ കളി പൂർണ്ണമായും ഐവറി കോസ്റ്റിന്റെ നിയന്ത്രണത്തിലായി.

രണ്ടാം പകുതിയിൽ സമനിലയ്ക്കായി കുറക്കാവോയുടെ ജുറീനിയോ ബകൂനയും ഷെറെൽ ഫ്ലോറനസും മികച്ച ശ്രമങ്ങൾ നടത്തിയെങ്കിലും ഐവറി കോസ്റ്റിന്റെ കടുകട്ടി പ്രതിരോധം വഴിമുടക്കി. കുറക്കാവോ സമ്മർദ്ദം ചെലുത്തുന്നതിനിടെ 64-ാം മിനിറ്റിൽ പെപ്പെ തന്റെയും ടീമിന്റെയും രണ്ടാം ഗോൾ നേടി സ്കോർ 2-0 ആക്കി. മിഡ്ഫീൽഡർ ഇബ്രാഹിം സങ്കാരെ നൽകിയ മനോഹരമായ ത്രൂ പാസ് സ്വീകരിച്ച്, പെനാൽറ്റി ബോക്സിനുള്ളിൽ നിന്ന് പെപ്പെ തൊടുത്ത ക്ലിനിക്കൽ ഷോട്ട് കുറക്കാവോ ഗോളി എലോയ് റൂമിനെ കാഴ്ചക്കാരനാക്കി വല തുളച്ചു.