ഐവറി കോസ്റ്റിനെതിരെ ഒന്നിനെതിരെ രണ്ട് ഗോളുകൾക്ക് വിജയം നേടി നോർവേ

2026 ഫിഫ ലോകകപ്പ് റൗണ്ട് ഓഫ് 32 പോരാട്ടത്തിൽ ഐവറി കോസ്റ്റിനെതിരെ ഒന്നിനെതിരെ രണ്ട് ഗോളുകൾക്ക് വിജയം നേടി നോർവേ പ്രീ-ക്വാർട്ടറിലേക്ക് പ്രവേശിച്ചു. ഡാലസ് സ്റ്റേഡിയത്തിൽ നടന്ന ആവേശകരമായ മത്സരത്തിൽ നോർവെയ്ക്കായി അന്റോണിയോ നൂസയും, സൂപ്പർ താരം എർലിങ് ഹാളണ്ടും ഗോളുകൾ നേടിയപ്പോൾ, ഐവറി കോസ്റ്റിന്റെ ആശ്വാസ ഗോൾ പകരക്കാരനായി ഇറങ്ങിയ അമദ് ഡിയാലോ വകയായിരുന്നു.

തുടക്കം മുതൽ ആഫ്രിക്കൻ കരുത്തരായ ഐവറി കോസ്റ്റ് മികച്ച മുന്നേറ്റങ്ങൾ നടത്തിയെങ്കിലും, നോർവേ പ്രതിരോധം കോട്ടപോലെ ഉറച്ചുനിന്നു. ആദ്യ പകുതി അവസാനിക്കാൻ മിനിറ്റുകൾ മാത്രം ബാക്കിനിൽക്കെ, 39-ാം മിനിറ്റിൽ നോർവേ മത്സരത്തിൽ ആദ്യ ലീഡ് നേടി. ബോക്സിന്റെ ഇടതുമൂലയിൽ നിന്ന് വിങ്ങർ അന്റോണിയോ നൂസ തൊടുത്ത മനോഹരമായ ലോങ് റേഞ്ചർ ഷോട്ട് ഐവറി കോസ്റ്റ് വല കുലുക്കുകയായിരുന്നു.

ഒരു ഗോളിന് പിന്നിൽ നിന്ന ഐവറി കോസ്റ്റ് രണ്ടാം പകുതിയിൽ കൂടുതൽ ആക്രമണകാരികളായി. തുടർച്ചയായ മുന്നേറ്റങ്ങളുടെ ഫലമായി, 74-ാം മിനിറ്റിൽ പകരക്കാരനായി എത്തിയ മാഞ്ചസ്റ്റർ യുണൈറ്റഡ് താരം അമദ് ഡിയാലോയിലൂടെ അവർ സമനില പിടിച്ചു. മത്സരം അധികസമയത്തേക്ക് നീളുമെന്നുറപ്പിച്ച ഘട്ടത്തിലാണ്, 86-ാം മിനിറ്റിൽ മാഞ്ചസ്റ്റർ സിറ്റി സൂപ്പർ താരം എർലിങ് ഹാളണ്ട് നോർവെയുടെ രക്ഷകനായി അവതരിക്കുന്നത്. പാട്രിക് ബെർഗ് നൽകിയ പാസ് ലക്ഷ്യത്തിലെത്തിച്ച് ഹാളണ്ട് നോർവേയ്ക്ക് ചരിത്ര വിജയം സമ്മാനിച്ചു.

ഇതോടെ 1998-ന് ശേഷം ആദ്യമായാണ് നോർവേ ലോകകപ്പിന്റെ പ്രീ-ക്വാർട്ടറിലേക്ക് പ്രവേശിക്കുന്നത്. അടുത്ത റൗണ്ടിൽ ബ്രസീലാണ് നോർവെയുടെ എതിരാളികൾ