വൈത്തിരി: പോലീസ് കൈ കാണിച്ച് നിര്‍ത്തിയ കാറില്‍ നിന്ന് ഇറങ്ങിയോടി ഇന്നലെ താമരശ്ശേരി ചുരത്തില്‍ നിന്ന് ചാടിയ മലപ്പുറം സ്വദേശി ഷഫീഖ് ആണ് പിടിയിലായത്. ഇന്ന് രാവിലെ വൈത്തിരി ഓറിയന്റല്‍ കോളേജിന് സമീപമുള്ള കാട്ടില്‍ നിന്ന് പരിക്കുകളോടെ ഇറങ്ങി വരുന്നത് കണ്ട പരിസരവാസികള്‍ പോലീസിനെ വിവരം അറിയിക്കുകയായിരുന്നു. തുടര്‍ന്ന് പോലീസ് സ്ഥലത്തെത്തി ഷഫീഖിനെ കസ്റ്റഡിയിലെടുത്തു. പരിക്കുകളെ തുടര്‍ന്ന് ആശുപത്രിയിലേക്ക് മാറ്റി.
ഇന്നലെ രാവിലെ ലക്കിടിയില്‍ വയനാട് ഗേറ്റിന് സമീപം വാഹന പരിശോധനയ്ക്കിടെയാണ് ഷഫീഖ് ചുരത്തില്‍നിന്ന് കൊക്കയിലേക്ക് ചാടി രക്ഷപ്പെട്ടത്. ഇയാളുടെ കാറില്‍നിന്ന് പോലീസ് 20.35 ഗ്രാം എംഡിഎംഎ കണ്ടെത്തിയിരുന്നു. കണ്ണൂര്‍ സെന്‍ട്രല്‍ ജയിലില്‍ നിന്ന് ചാടിയ ഗോവിന്ദച്ചാമിയെ പിടികൂടുന്നതിന്റെ ഭാഗമായി ജാഗ്രതാ നിര്‍ദേശം ലഭിച്ചതിനെത്തുടര്‍ന്ന് ജില്ലാ അതിര്‍ത്തിയില്‍ വാഹനപരിശോധന നടത്തുകയായിരുന്നു. പോലീസ് പരിശോധിക്കാനൊരുങ്ങവെ കാറിലുണ്ടായിരുന്ന ഷഫീഖ് ഇറങ്ങിയോടി 20 അടിയോളം താഴ്ചയുള്ള ഭാഗത്തേക്ക് എടുത്തു ചാടുകയായിരുന്നു.
തുടര്‍ന്ന് വൈത്തിരി, താമരശ്ശേരി പോലീസും സന്നദ്ധ സംഘടനാ പ്രവര്‍ത്തകരും കല്പറ്റ അഗ്‌നിരക്ഷാസേനയും ചേര്‍ന്ന് ഉച്ചവരെ തിരച്ചില്‍ നടത്തി. ഡ്രോണ്‍ ഉപയോഗിച്ച് പരിശോധന നടത്തിയിട്ടും ഇയാളെ കണ്ടെത്താനായിരുന്നില്ല.
About the Author
