മാധ്യമവ്യവസായ ഭീമന്‍ റുപെര്‍ട്ട് മര്‍ഡോക്കാണ് 92-ാം വയസില്‍ അഞ്ചാം വിവാഹത്തിനൊരുങ്ങുന്നത്.. അറുപത്തിയേഴുകാരിയായ ശാസ്ത്രജ്ഞ എലീന സുക്കോവയാണ് വധു. മോളിക്യൂലാര്‍ ബയോളജിസ്റ്റാണ് എലീന. കഴിഞ്ഞ ഓഗസ്റ്റില്‍ തന്നെ ഇവരുവരും പ്രണയബന്ധത്തിലാണെന്ന വാര്‍ത്തകള്‍ പ്രചരിച്ചിരുന്നു.കഴിഞ്ഞ ഏപ്രിലില്‍ കാമുകിയായിരുന്ന അറുപത്തിയാറുകാരി ആന്‍ ഡെസ്ലി സ്മിതുമായി മര്‍ഡോക്കിന്റെ വിവാഹനിശ്ചയം കഴിഞ്ഞിരുന്നു. എന്നാല്‍ ഒരുമാസം പിന്നിടും മുന്‍പ് തന്നെ ഇരുവരും വിവാഹത്തില്‍നിന്ന് പിന്മാറുകയാണെന്ന വാര്‍ത്തകള്‍ പുറത്തുവന്നു. കാമുകിയുടെ തീവ്രമായുള്ള മതപരമായ കാഴ്ചപ്പാടുകളാണ് ആ വിവാഹനിശ്ചയത്തില്‍നിന്ന് റൂപര്‍ട്ട് പിന്മാറാന്‍ കാരണമെന്നായിരുന്നു റിപ്പോര്‍ട്ടുകള്‍.ആറാം തവണയാണ് റുപെര്‍ട്ടിന്റെ വിവാഹനിശ്ചയം കഴിയുന്നത്.മര്‍ഡോക്കിന്റെ മൂന്നാം ഭാര്യ വെന്‍ഡി ഡെങ് വഴിയാണ് റുപെര്‍ട്ടും എലീനയും പരിചയപ്പെട്ടുന്നത്. 14 വര്‍ഷത്തെ വിവാഹ ബന്ധത്തിനുശേഷം 2013ലാണ് മര്‍ഡോക്കും വെന്‍ഡി ഡെങ്ങും വേര്‍പിരിയുന്നത്. ലോസ് ആഞ്ചല്‍സിലെ കാലിഫോര്‍ണിയ യൂണിവേഴ്സിറ്റിയിലുള്ള മെഡിക്കല്‍ റിസര്‍ച്ച് യൂണിറ്റിലായിരുന്നു എലീന ശാസ്ത്രജ്ഞയായി ജോലി ചെയ്തിരുന്നത്. എലീനയ്ക്ക് ആദ്യ വിവാഹത്തില്‍ ഒരു മകളുണ്ട്, ഡാഷ സുക്കോവ. റഷ്യന്‍ – അമേരിക്കന്‍ വംശജയായ ഡാഷ ആര്‍ട്ട് കളക്ടറാണ്.
ഫോക്സ് ന്യൂസ് ചാനലും വാള്‍സ്ട്രീറ്റ് ജേര്‍ണലുമുള്‍പ്പെടെയുള്ള മാധ്യമങ്ങളുടെ ഉടമസ്ഥരായ ഫോക്സ് കോര്‍പറേഷന്റെ മുന്‍ ചെയര്‍മാനായിരുന്നു മര്‍ഡോക്. അഞ്ച് മാസം മുന്‍പാണ് ഫോക്സ് ന്യൂസ് സ്ഥാപകനായ റുപെര്‍ട്ട് മര്‍ഡോക്ക് ഫോക്സിന്റെ മാതൃ കമ്പനിയുടെയും ന്യൂസ് കോര്‍പ്പറേഷന്‍ മീഡിയ ഹോള്‍ഡിംഗുകളുടെയും തലവന്‍ സ്ഥാനമൊഴിയുകാണെന്ന വാര്‍ത്തകള്‍ പുറത്തുവന്നത്. പിന്നാലെയാണ് അഞ്ചാം വിവാഹത്തിനൊരുങ്ങുന്നതായി പ്രഖ്യാപിക്കുന്നത്.മര്‍ഡോക്കിന്റെ കാലിഫോര്‍ണിയയിലെ മുന്തിരിത്തോട്ടവും എസ്റ്റേറ്റുമായ മൊറാഗയില്‍ നടക്കാനിരിക്കുന്ന വിവാഹത്തിന്റെ ക്ഷണങ്ങള്‍ ഇതിനകം തന്നെ അതിഥികള്‍ക്ക് വിതരണം ചെയ്തതായി മര്‍ഡോക്കിന്റെ പ്രതിനിധിയെ ഉദ്ധരിച്ച് ടൈംസ് റിപ്പോര്‍ട്ട് ചെയ്തിരുന്നു. ബ്ലൂംബെര്‍ഗ് റിപ്പോര്‍ട്ട് അനുസരിച്ച് ഏകദേശം 1890 കോടി യുഎസ് ഡോളറിന്റെ ആസ്തിയാണ് റുപെര്‍ട്ട് മര്‍ഡോക്കിനുള്ളത്.