ഇംഗ്ലണ്ടിന്‍റെ ഒന്നാമിന്നിങ്സിലെ റണ്‍മല കയറാനൊരുങ്ങിയ ഇന്ത്യ പിന്നോട്ട്. 55 റണ്‍സിന് നാലുവിക്കറ്റെടുത്ത ഡൊമിനിക് ബെസ്സും രണ്ട് വിക്കറ്റ് വീഴ്ത്തിയ ജോഫ്ര ആര്‍ച്ചറുമാണ് ഇന്ത്യക്ക് കുരുക്കിട്ടത്. 578 റണ്‍സ് പിന്തുടര്‍ന്നിറങ്ങിയ ഇന്ത്യ മൂന്നാംദിനം കളിനിര്‍ത്തുമ്പോള്‍ 257 റണ്‍സിന് ആറുവിക്കറ്റെന്ന നിലയിലാണ്. 68 പന്തില്‍ നിന്നും 33 റണ്‍സെടുത്ത വാഷിങ്ടണ്‍ സുന്ദറും 54 പന്തില്‍ 8 റണ്‍സെടുത്ത രവിചന്ദ്രന്‍ അശ്വിനുമാണ് ക്രീസിലുള്ളത്.
സ്കോര്‍ബോര്‍ഡില്‍ 19 റണ്‍സായപ്പോഴേക്കും രോഹിത് ശര്‍മയെ നഷ്ടപ്പെട്ടുതുടങ്ങിയ ഇന്ത്യന്‍ ഇന്നിങ്സിനെ 91 റണ്‍സെടുത്ത റിഷഭ് പന്തും 73 റണ്‍സെടുത്ത ചേതേശ്വര്‍ പുജാരയുമാണ് താങ്ങി നിര്‍ത്തിയത്. നന്നായിത്തുടങ്ങിയ ശുഭ്മാന്‍ ഗില്‍ 29ഉം നായകന്‍ വിരാട് കോഹ്ലി 11ഉം ഉപനായകന്‍ അജിന്‍ക്യ രഹാനെ ഒന്നും റണ്‍സെടുത്ത് മടങ്ങി.
