സ്കോട്ടിഷ് പടയെ തകർത്ത് ബ്രസീൽ നോക്കൗട്ടിൽ; വിനീഷ്യസിന് ഇരട്ട ഗോൾ

മത്സരം ആരംഭിച്ച് ഏഴാം മിനിറ്റിൽ തന്നെ സ്കോട്ടിഷ് പ്രതിരോധത്തിന്റെ മാരകമായ പിഴവ് മുതലെടുത്ത് ബ്രസീൽ മുന്നിലെത്തി. സ്വന്തം ബോക്സിനുള്ളിൽ വെച്ച് സ്കോട്ടിഷ് ഡിഫെൻഡർ സ്കോട്ട് മക്‌കെന്ന വരുത്തിയ പിഴവിൽ നിന്ന് പന്ത് തട്ടിയെടുത്ത വിനീഷ്യസ് ജൂനിയർ, ഗോൾകീപ്പർ ആംഗസ് ഗണ്ണിനെ കബളിപ്പിച്ച് പന്ത് അനായാസം വലയിലെത്തിക്കുകയായിരുന്നു (1-0). 22-ാം മിനിറ്റിൽ വിനീഷ്യസ് വീണ്ടും വലകുലുക്കിയെങ്കിലും ഫൗൾ കണ്ടെത്തിയതിനെ തുടർന്ന് വാർ പരിശോധനയിലൂടെ റഫറി ആ ഗോൾ റദ്ദാക്കി.

എന്നാൽ ആദ്യപകുതിയുടെ അധിക സമയത്ത് (45+2 മിനിറ്റ്) വിനീഷ്യസ് തന്റെ രണ്ടാം ഗോൾ സ്വന്തമാക്കി. മിഡ്ഫീൽഡർ ബ്രൂണോ ഗ്വിമറെസ് ബോക്സിലേക്ക് ഉയർത്തി നൽകിയ മനോഹരമായ പാസ് ഒരു തകർപ്പൻ ഹെഡറിലൂടെ വിനീഷ്യസ് സ്കോട്ടിഷ് വലയിലെത്തിക്കുകയായിരുന്നു (2-0). ഇതോടെ നടപ്പു ലോകകപ്പിലെ മൂന്ന് ഗ്രൂപ്പ് മത്സരങ്ങളിലും ഗോൾ നേടുന്ന അപൂർവ്വ റെക്കോർഡും റയൽ മാഡ്രിഡ് താരം സ്വന്തമാക്കി.

രണ്ടാം പകുതിയിൽ സ്കോട്ട്‌ലൻഡ് നായകൻ ആൻഡ്രൂ റോബർട്ട്സണെ പിൻവലിച്ച് കീറൻ ടിയേണിയെ ഇറക്കി പ്രതിരോധം ശക്തമാക്കാൻ നോക്കിയെങ്കിലും ഫലമുണ്ടായില്ല. കളിയുടെ 60-ാം മിനിറ്റിൽ ബ്രൂണോ ഗ്വിമറെസിന്റെ മികച്ചൊരു നീക്കത്തിനൊടുവിൽ ലഭിച്ച പാസ് സ്വീകരിച്ച് മാത്യൂസ് കുന്യ ബ്രസീലിന്റെ മൂന്നാം ഗോൾ നേടി (3-0). തുടർന്ന് 76-ാം മിനിറ്റിൽ ആരാധകർ കാത്തിരുന്ന ആ ചരിത്ര നിമിഷം മയാമി സ്റ്റേഡിയത്തിൽ പിറന്നു. പരിക്കിനെ തുടർന്ന് രണ്ട് വർഷത്തിലേറെയായി അന്താരാഷ്ട്ര ഫുട്ബോളിൽ നിന്ന് വിട്ടുനിന്ന ബ്രസീലിന്റെ സുൽത്താൻ നെയ്മർ ജൂനിയർ, കുന്യക്ക് പകരക്കാരനായി മൈതാനത്തേക്ക് പ്രവേശിച്ചു. നെയ്മറുടെ സാന്നിധ്യം ടീമിന്റെ ആത്മവിശ്വാസം ഇരട്ടിയാക്കി. അവസാന മിനിറ്റുകളിൽ സ്കോട്ട് മക്ടോമിനെയുടെ മാരകമായ ഷോട്ട് ബ്രസീലിയൻ ഗോളി അലിസൺ ബെക്കർ തട്ടിയകറ്റിയതോടെ കാനറികൾ ക്ലീൻ ഷീറ്റ് വിജയവുമായി കളം വിട്ടു.