ഫിഫ ലോകകപ്പ് ഗ്രൂപ്പ് ബിയിലെ നിർണായക പോരാട്ടത്തിൽ ഖത്തറിനെ തകർത്ത് ബോസ്നിയ ആൻഡ് ഹെർസഗോവിന പ്രീ-ക്വാർട്ടർ പ്രവേശനത്തിന് തൊട്ടരികിലെത്തി. ഒന്നിനെതിരെ മൂന്ന് ഗോളുകൾക്കായിരുന്നു ബോസ്നിയൻ ഡ്രാഗൺസിന്റെ ഉജ്ജ്വല വിജയം. ഗ്രൂപ്പിൽ മൂന്നാം സ്ഥാനക്കാരായി കളി അവസാനിപ്പിച്ച ബോസ്നിയ മികച്ച മൂന്നാം സ്ഥാനക്കാരുടെ ആനുകൂല്യത്തിൽ നോക്കൗട്ടിലേക്ക് യോഗ്യത നേടാനാണ് സാധ്യത. അതേസമയം, വൻ പ്രതീക്ഷകളോടെ വന്ന ഖത്തറിന് മൂന്ന് മത്സരങ്ങളിൽ നിന്ന് ഒരു പോയിന്റ് പോലും നേടാനാകാതെ നാണംകെട്ട് മടങ്ങേണ്ടി വന്നു.
യുവതാരത്തിന്റെ വെടിക്കെട്ടും സെൽഫ് ഗോളും
മത്സരത്തിന്റെ തുടക്കം മുതൽ ആക്രമിച്ചു കളിച്ച ബോസ്നിയ 29-ാം മിനിറ്റിൽ ആദ്യ ഗോൾ നേടി. ഇവാൻ ബാസിച്ചിന്റെ അസിസ്റ്റിൽ നിന്നും 18 കാരനായ യുവതാരം കെരിം അലാജ്ബെഗോവിച്ചാണ് ബോക്സിന് പുറത്തുനിന്നുള്ള തകർപ്പൻ ലോങ് റേഞ്ചർ ഷോട്ടിലൂടെ ബോസ്നിയയെ മുന്നിലെത്തിച്ചത്. ഇതോടെ ലോകകപ്പ് ചരിത്രത്തിൽ ബോസ്നിയയ്ക്കായി ഗോളടിക്കുന്ന ഏറ്റവും പ്രായം കുറഞ്ഞ താരമെന്ന റെക്കോർഡും അലാജ്ബെഗോവിച്ച് സ്വന്തമാക്കി.
തൊട്ടുപിന്നാലെ 34-ാം മിനിറ്റിൽ ബോസ്നിയ നായകൻ എഡിൻ സെക്കോ തന്റെ 150-ാം അന്താരാഷ്ട്ര മത്സരം കളിക്കുന്ന ചരിത്ര നിമിഷത്തിൽ ടീമിന്റെ ലീഡുയർത്താൻ കാരണക്കാരനായി. സെക്കോ തൊടുത്ത വോളി ഖത്തർ പ്രതിരോധ താരം സുൽത്താൻ അൽ ബ്രേക്കിന്റെ ശരീരത്തിൽ തട്ടി സ്വന്തം വലയിലേക്ക് തന്നെ കയറുകയായിരുന്നു (സെൽഫ് ഗോൾ).
തിരിച്ചടിച്ച് ഖത്തർ, കളി തീർത്ത് മഹ്മിക്
രണ്ട് ഗോൾ വഴങ്ങിയതോടെ ഉണർന്നു കളിച്ച ഖത്തർ ആദ്യപകുതി അവസാനിക്കാൻ മിനിറ്റുകൾ ബാക്കിനിൽക്കെ ഒരു ഗോൾ മടക്കി. 42-ാം മിനിറ്റിൽ ക്യാപ്റ്റൻ ഹസൻ അൽ ഹൈദോസാണ് ഖത്തറിന് ആശ്വാസ ഗോൾ സമ്മാനിച്ചത്. രണ്ടാം പകുതിയിൽ സമനിലയ്ക്കായി അക്രം അഫീഫിലൂടെ ഖത്തർ ചില മികച്ച നീക്കങ്ങൾ നടത്തിയെങ്കിലും ബോസ്നിയൻ പ്രതിരോധം കാത്തു.
തുടർന്ന് 80-ാം മിനിറ്റിൽ പകരക്കാരനായി ഇറങ്ങിയ എർമിൻ മഹ്മിക് ബോക്സിലെ ലൂസ് ബോൾ കൃത്യമായി വലയിലെത്തിച്ച് ബോസ്നിയയുടെ തകർപ്പൻ ജയവും (3-1) നോക്കൗട്ട് പ്രതീക്ഷകളും ഉറപ്പിച്ചു. ഖത്തർ ടീമിലെ മലയാളി സാന്നിധ്യമായ തഹ്സിൻ മുഹമ്മദിന് ഈ മത്സരത്തിലും പകരക്കാരുടെ ബെഞ്ചിൽ തന്നെയായിരുന്നു സ്ഥാനം. ഈ ഗ്രൂപ്പിൽ നിന്നും സ്വിറ്റ്സർലൻഡും കാനഡയും നേരത്തെ തന്നെ ആദ്യ രണ്ട് സ്ഥാനക്കാരായി നോക്കൗട്ടിലേക്ക് യോഗ്യത നേടിയിരുന്നു.
About the Author
