ഗർഭിണികൾക്കും വൃദ്ധർക്കും സീറ്റ് ഒഴിഞ്ഞു കൊടുക്കുന്നതാണ് പതിവ് രീതി. എന്നാൽ ഗർഭിണിയായ ഒരു സ്ത്രീ വന്ന് ഈ സീറ്റ് എനിക്ക് തരാമോ എന്ന് ചോദിച്ചപ്പോൾ താൻ കൊടുത്തില്ലെന്ന ഒരു യുവാവിന്റെ പോസ്റ്റ് ഇപ്പോൾ വൈറലാവുകയാണ്. സംഭവം ബസിലല്ല. വിമാനത്തിലാണ്. ഇയാളുടെ പോസ്റ്റിനേക്കാൾ വൈറലാകുന്നത് അതിനടിയിലെ കമന്റുകളാണ്. സീറ്റ് മാറി ക്കൊടുക്കാത്തത് നന്നായി, അതിന്റെ ആവശ്യമൊന്നുമില്ല, എന്നാണ് ഒരു വിഭാഗം ആളുകൾ അഭിപ്രായപ്പെട്ടത്. എന്നാൽ, മറ്റൊരു വിഭാഗം പറഞ്ഞത് അയാൾ യാതൊരു കരുണയുമില്ലാത്ത ഒരു മനുഷ്യൻ തന്നെ എന്നാണ്. അതേസമയം വേറെ ചിലർ പറഞ്ഞത്, അയാൾക്ക് ആരോഗ്യപ്രശ്നങ്ങളുള്ളത് കൊണ്ടല്ലേ ആ സീറ്റ് ബുക്ക് ചെയ്തത്, അതെങ്ങനെ മാറിക്കൊടുക്കും എന്നാണ്.
റെഡ്ഡിറ്റിലാണ് യുവാവ് ഈ സംഭവം പോസ്റ്റ് ചെയ്തിരിക്കുന്നത്. ഇയാളുടെ പോസ്റ്റിൽ പറയുന്നത്, വിമാനത്തിൽ കയറിയ ഉടനെ ഒരു ഗർഭിണിയായ സ്ത്രീ എന്നോട് എന്റെ സീറ്റ് അവർക്ക് കൊടുക്കാമോ എന്ന് ചോദിച്ചു. കാരണം, എന്റെ സീറ്റ് റെസ്റ്റ്‍‍റൂമിന്റെ അടുത്തായിരുന്നു. അവർ ഗർഭിണിയാണെങ്കിലും അത്ര ആകുലയായിട്ടൊന്നുമല്ല ഉണ്ടായിരുന്നത്. സീറ്റ് അവർക്ക് കൊടുക്കാത്തത് കൊണ്ട് താനൊരു മോശക്കാരനാണോ എന്നാണ് ഇയാളുടെ ചോദ്യം. അതോടൊപ്പം അധികം പണം കൊടുത്ത് താൻ ഈ സീറ്റ് തന്നെ ബുക്ക് ചെയ്യുന്നതിന് കാരണം തനിക്ക് ബാത്ത്‍റൂം അടുത്ത് വേണം എന്നത് കൊണ്ടാണ്. തനിക്ക് ചില ആരോഗ്യപ്രശ്നങ്ങളുണ്ട് എന്നും ഇയാൾ പറയുന്നു. അതുകൊണ്ടാണ് താൻ കഷ്ടപ്പെട്ട് നേടിയ ആ സീറ്റ് ഗർഭിണിയായ സ്ത്രീക്ക് കൊടുക്കാത്തത് എന്നാണ് അയാൾ പറയുന്നത്