ആർഭാടങ്ങളും ആഘോഷവും ഒഴിവാക്കി വിവാഹം കഴിക്കാൻ തീരുമാനമെടുത്ത് സിവില്‍ സര്‍വീസില്‍ 113-ാം റാങ്ക് നേടിയ ആര്യ ആര്‍ നായര്‍.വിവാഹം ലളിതമായി നടത്താനാണ് തീരുമാനമെന്ന് ആര്യ ഫേസ്ബുക്ക് പോസ്റ്റില്‍ കുറിച്ചു .വിവാഹാഘോഷങ്ങള്‍ ഒഴിവാക്കി, അര്‍ഹതപ്പെട്ട 20 കുഞ്ഞുങ്ങളുടെ വിദ്യാഭ്യാസച്ചെലവുകള്‍ ഏറ്റെടുക്കാനാണ് ഇരുവരുടെയും തീരുമാനമെന്നും ആര്യ ഫേസ്ബുക് പോസ്റ്റിൽ വ്യക്തമാക്കി.
പാമ്പാടി സബ് രജിസ്ട്രാര്‍ ഓഫീസില്‍ സ്പെഷ്യല്‍ മാര്യേജ് ആക്ട് പ്രകാരം വെള്ളിയാഴ്ചയാണ് വിവാഹം. ദില്ലി സ്വദേശിയും അഹമ്മദാബാദില്‍ നികുതി വകുപ്പില്‍ അസിസ്റ്റന്റ് കമ്മിഷണറുമായ ശിവം ത്യാഗിയാണ് വരന്‍.
ഈ പുതിയ യാത്രയിൽ എല്ലാവരുടേയും പ്രാർത്ഥനയും അനുഗ്രഹവും ഉണ്ടാകണം എന്നും ആര്യ പോസ്റ്റില്‍ കുറിച്ചു. ശിവത്തിനൊപ്പമുള്ള ചിത്രം പങ്കുവച്ചാണ് ആര്യ കുറിപ്പ് ഫേസ് ബുക്കില്‍ പങ്കുവച്ചത്. നാഗ്പൂരില്‍ ഐ.ആര്‍.എസ്. പരിശീലനത്തിലാണ് ആര്യ ഇപ്പോള്‍. ഏപ്രിലോടെ സര്‍വീസില്‍ പ്രവേശിക്കും.