നെടുമ്പാശേരിയിൽ റോഡിലെ കുഴിയിൽ പെട്ട് തെറിച്ചു വീണ ബൈക്ക് യാത്രികൻ മറ്റൊരു വാഹനമിടിച്ചു മരിച്ചു. പറവൂർ മാഞ്ഞാലി മനക്കപ്പടി സ്വദേശി ഹാഷിമാണ് (52) മരിച്ചത്. ഹോട്ടൽ ജീവനക്കാരനായിരുന്നു ഇദ്ദേഹം. വെള്ളിയാഴ്ച രാത്രി വീട്ടിലേക്ക് ജോലി കഴിഞ്ഞ് മടങ്ങുന്നതിനിടയിലാണ് അപകടമുണ്ടായത്. ഹാഷിമിനെ ഇടിച്ച വാഹനം നിർത്താതെ പോയി.കുത്തനെയുള്ള വളവിലെ കുഴിയിൽ വീണ സ്കൂട്ടറിൽ നിന്ന് ഹാഷിം റോഡിലേക്ക് തെറിച്ചു വീഴുകയും അപ്പോൾ പിറകിൽ നിന്ന് വന്ന വാഹനം ദേഹത്ത് കയറി ഇറങ്ങുകയും ആയിരുന്നു എന്നാണ് നാട്ടുകാർ പറയുന്നത്.