കേരളത്തിൽ ബിജെപിക്ക് അക്കൗണ്ട് തുറക്കാൻ എൽഡിഎഫിന്റെ സഹായം തേടിയെന്ന് ടി ജി നന്ദകുമാർ. ഇതിനായി ബി.ജെ.പി ദേശീയ നിർവാഹക സമിതി അംഗം പ്രകാശ് ജാവദേക്കർ ഇ പി ജയരാജനുമായി കൂടിക്കാഴ്ച നടത്തിയിരുന്നു. പകരം ലാവ്‌ലിൻ കേസ് ഒത്തു തീർപ്പാക്കാമെന്ന് ജാവദേക്കര്‍ ഉറപ്പ് നൽകിയെന്നും ടി ജി നന്ദകുമാർ മാധ്യമങ്ങളോട് പറഞ്ഞു. എന്നാൽ ഇ പി ജയരാജൻ ഇത് നിരസിച്ചു. സ്വർണക്കടത്തിൽ വാഗ്ദാനം നൽകിയെങ്കിലും ഇ പി സമ്മതിച്ചില്ലെന്നും നന്ദകുമാർ വ്യക്തമാക്കി
കൂടാതെ കെ സുധാകരനും പ്രകാശ് ജാവദേക്കറുമായി കൂടിക്കാഴ്ച നടത്തിയിരുന്നു. പിന്നാലെ ബിജെപിയിലേക്ക് പോകാൻ കെ സുധാകരൻ തീരുമാനമെടുത്തിരുന്നു. എന്നാൽ കെപിസിസി അധ്യക്ഷ സ്ഥാനം കിട്ടിയപ്പോൾ കെ സുധാകരൻ ചാടിപ്പോയെന്നും ടി ജി നന്ദകുമാർ മാധ്യമങ്ങളോട് വെളിപ്പെടുത്തി. ഭൂമി വാങ്ങാൻ ശോഭ സുരേന്ദ്രന് 10 ലക്ഷം രൂപ കൈമാറിയിരുന്നു. പിന്നിട് ശോഭ സുരേന്ദ്രൻ നൽകിയ രേഖകളിൽ ചില അവ്യക്തതകൾ ഉണ്ടായതിനാല്‍ കത്ത് അയച്ചു. ശോഭ സുരേന്ദ്രൻ തെരഞ്ഞെടുപ്പ് കമ്മിഷന് നൽകിയ സ്വത്ത് വിവരങ്ങളിൽ ഈ ഭൂമിയുടെ കാര്യം പറയുന്നില്ല. താൻ അയച്ച കത്തുകൾക്ക് മറുപടി നൽകിയിട്ടില്ല. ശോഭ സുരേന്ദ്രൻ അന്യായമായി കൈ അടക്കിയ ഭൂമിയാണ് തനിക്ക് വിൽക്കാൻ ശ്രമിച്ചതെന്നും നന്ദകുമാർ ആരോപിച്ചു