സമയം രാത്രി 2.30. ഉറക്കത്തിന്റെ മൂർദ്ധന്യാവസ്ഥ. സോഷ്യൽ മീഡിയയിൽ പോസ്റ്റ് ചെയ്യപ്പെട്ട ഒരു സിസിടിവി ദൃശ്യം കാഴ്ചക്കാരെ ആശങ്കപ്പെടുത്തുകയാണ്. ഒരു അപ്പാർട്ട്മെന്‍റിനുള്ളിൽ പുലർച്ചെ 2.30 ന് കയറിയ രണ്ട് യുവതികൾ താമസക്കാരെ ഭയപ്പെടുത്തുന്നതിനായി കോളിംഗ് ബെല്ലുകൾ അടിക്കുന്നതും വീടുകളുടെ വാതിലുകൾ പുറത്തുനിന്ന് അടയ്ക്കുന്നതുമാണ് സിസിടിവി ദൃശ്യങ്ങളിൽ ഉള്ളത്
ശ്രേഷ്ഠ് പോദ്ദാർ എന്ന അപ്പാർട്ട്മെന്‍റിലെ ഒരു താമസക്കാരനാണ് ഫ്ലാറ്റിലെ സിസിടിവിയിൽ പതിഞ്ഞ ദൃശ്യങ്ങൾ സോഷ്യൽ മീഡിയയിൽ പങ്കുവച്ചത്. യുവതികളുടെ ഈ പ്രവർത്തി കെട്ടിടത്തിലെ മുതിർന്ന പൗരന്മാർ ഉൾപ്പെടെയുള്ള താമസക്കാരിൽ വലിയ അസ്വസ്ഥതയും ഭയവുമാണ് ഉണ്ടാക്കിയതെന്ന് വീഡിയോയോടൊപ്പം ചേർത്ത കുറിപ്പിൽ പോദ്ദാർ പറയുന്നു. ഇവിടുത്തെ താമസക്കാരിൽ 55 ൽ അധികം പ്രായമുള്ള മുതിർന്ന പൗരന്മാരാണ്. അടുത്തകാലത്തായി സമീപപ്രദേശങ്ങളിൽ കവർച്ചാ ശ്രമങ്ങളും തീപിടുത്തങ്ങളും കൊലപാതകങ്ങളും നടന്നിട്ടുള്ളതിനാൽ അപ്പാർട്ട്മെന്‍റിലെ താമസക്കാർ ഏറെ ആശങ്കയോടെയാണ് ഇവിടെ കഴിയുന്നതെന്നും അദ്ദേഹം പറഞ്ഞു. ഇതിനിടയിലാണ് യുവതികളുടെ ഈ അനാവശ്യമായ പ്രവർത്തി വലിയ ആശങ്കകൾക്ക് വഴിവെച്ചത്
പല വീടുകളും യുവതികൾ പുറത്ത് നിന്ന് പൂട്ടിയത് ആശങ്ക വർധിപ്പിച്ചതായും അദ്ദേഹം കൂട്ടിച്ചേര്‍ത്തു. പുലർച്ചെ സിസിടിവി ദൃശ്യങ്ങൾ പരിശോധിച്ചപ്പോഴാണ് മദ്യപിച്ചെത്തിയ രണ്ട് യുവതികളാണ് പ്രശ്നങ്ങൾ ഉണ്ടാക്കിയതെന്ന് അപ്പാർട്ട്മെന്‍റിലെ താമസക്കാർക്ക് മനസ്സിലായത്. യുവതികളിൽ ഒരാൾ കോളിംഗ് ബെല്ലുകൾ അടിക്കുകയും വാതിലുകൾ പൂട്ടുകയും ചെയ്യുമ്പോൾ രണ്ടാമത്തെ യുവതി ഇതെല്ലാം തന്‍റെ മൊബൈൽ ക്യാമറയിൽ പകർത്തുന്നതും ഇരുവരും ചിരിച്ചുകൊണ്ട് പ്രവർത്തികൾ ആസ്വദിക്കുന്നതും സിസിടിവി ദൃശ്യങ്ങളില്‍ കാണാം