ഒരു സ്‌കൂളിലും ജന്റർ ന്യൂട്രൽ യൂണിഫോം അടിച്ചേൽപ്പിക്കില്ലെന്ന് പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി. തുല്യതാ യൂണിഫോം വിഷയത്തിൽ സർക്കാറിന് ഒരു നിർബന്ധവും ഇല്ല. ഈ വിഷയത്തിൽ സർക്കാർ നിലപാട് ആവർത്തിച്ചു വ്യക്തമാക്കിയതാണ്. എന്നിട്ടും പ്രതിഷേധം ഉണ്ടാക്കുന്നവർ ഒന്നുകൂടി ആലോചിക്കണം. അവരെ ആരെങ്കിലും തെറ്റിദ്ധരിപ്പിച്ചതാവാമെന്നും വി. ശിവൻകുട്ടി പറഞ്ഞു.
കഴിഞ്ഞ ദിവസം ജെന്റർ ന്യൂട്രൽ യൂണിഫോം അടക്കമുള്ള വിഷയങ്ങൾ ചർച്ച ചെയ്യുന്നതിനായി മുസ്‌ലിം സംഘടനകൾ കോഴിക്കോട് യോഗം ചേർന്നിരുന്നു. ഇക്കാര്യത്തിൽ സർക്കാറിന്റെ നിലപാട് സംശയാസ്പദമാണെന്നായിരുന്നു സമസ്ത പ്രസിഡന്റ് ജിഫ്രി മുത്തുക്കോയ തങ്ങളുടെ പ്രതികരണം. ജെന്റർ ന്യൂട്രൽ യൂണിഫോം നടപ്പാക്കുന്നതിനെതിരെ ബോധവത്കരണ കാമ്പയിൻ സംഘടിപ്പിക്കുമെന്ന് സമസ്ത നേതാവ് നാസർ ഫൈസി കൂടത്തായിയും പറഞ്ഞിരുന്നു. ഈ സാഹചര്യത്തിലാണ് വിദ്യാഭ്യാസ മന്ത്രി വീണ്ടും സർക്കാർ നിലപാട് വ്യക്തമാക്കിയത്.