കൊലപാതകങ്ങളും ക്വട്ടേഷന്‍ സംഘങ്ങളേയും തടയുന്നതില്‍ സര്‍ക്കാര്‍ പരാജയപ്പെട്ടെന്ന് ബി ജെ പി സംസ്ഥാന അധ്യക്ഷന്‍ കെ സുരേന്ദ്രന്‍. മയക്കുമരുന്ന് മാഫിയയും ക്വട്ടേഷന്‍ സംഘങ്ങളും സംസ്ഥാനത്ത് അഴിഞ്ഞാടുകയാണെന്നാണ് ബിജെപിയുടെ ആരോപണം. ഹരിപ്പാട്ട് ബിജെപി പ്രവര്‍ത്തകന്‍ കുത്തേറ്റ് മരിച്ച പശ്ചാത്തലത്തിലായിരുന്നു സുരേന്ദ്രന്റെ പ്രതികരണം. ഹരിപ്പാട്ടെ കൊലപാതകത്തിന് പിന്നില്‍ സി.പി.ഐ.എം ആണെന്ന് സുരേന്ദ്രന്‍ ആരോപിച്ചു. കേരളത്തിലെ ക്രമസമാധാന നില ആകെ തകര്‍ന്നെന്നും സുരേന്ദ്രന്‍ വിമര്‍ശിച്ചു.
ഹരിപ്പാട്ടെ കൊലപാതകത്തിന് പിന്നിലുള്ള ഏഴ് പ്രതികളും സി.പി.ഐ.എം പ്രവര്‍ത്തകരാണെന്നാണ് ബിജെപി ആരോപിക്കുന്നത്. കഞ്ചാവ് വില്‍പന ഉള്‍പ്പെടെയുള്ള പ്രവര്‍ത്തനങ്ങളില്‍ ഏര്‍പ്പെടുന്ന മാഫിയ സംഘത്തിലെ അംഗങ്ങളാണ് ഇവരെന്നും സുരേന്ദ്രന്‍ പറഞ്ഞു.