കല്‍പറ്റ: വയനാട് മെഡിക്കല്‍ കോളജിന് സ്ഥലം കണ്ടെത്താന്‍ വീണ്ടും ഉദ്യോഗസ്ഥരുടെ ഭൂമി പരിശോധന. അഞ്ചുവര്‍ഷത്തിനിടെ കണ്ടെത്തിയ സ്ഥലങ്ങള്‍ വീണ്ടും പരിശോധിക്കുകയാണ്.
ഉടന്‍ ഭൂമി കണ്ടെത്തണമെന്നാണ് സര്‍ക്കാര്‍ നിര്‍ദേശം. അനുയോജ്യമായ സ്ഥലത്തിന് ബുധനാഴ്ചയും ജില്ലയില്‍ പരിശോധന തുടര്‍ന്നു. മാനന്തവാടി താലൂക്ക് പേരിയ വില്ലേജിലെ ബോയ്സ്ടൗണ്‍, വൈത്തിരി താലൂക്ക് ചുണ്ടേല്‍ വില്ലേജിലെ ചേലോട്, കോട്ടത്തറ വില്ലേജിലെ മടക്കിമല എന്നീ ഭൂമികളാണ് പരിശോധിക്കുന്നത്.
ഇതിനകം ചേലോട്ട് കണ്ടെത്തുകയും നിരവധി നടപടി ക്രമങ്ങള്‍ പൂര്‍ത്തിയാക്കുകയും ചെയ്ത സ്ഥലമടക്കം വീണ്ടും പരിശോധിക്കുന്നതിെന്‍റ കാരണം വ്യക്തമല്ല.
മേപ്പാടി അരപ്പറ്റയിലെ ഡി.എം. വിംസ് മെഡിക്കല്‍ കോളജ് വില നല്‍കി ഏറ്റെടുക്കാനുള്ള സര്‍ക്കാര്‍ നീക്കം, കഴിഞ്ഞയാഴ്ച ഉപേക്ഷിച്ചതിനുപിന്നാലെയാണ് ഗവ. മെഡിക്കല്‍ കോളജ് കെട്ടിടങ്ങള്‍ നിര്‍മിക്കാന്‍ വിവിധ വകുപ്പ് ഉദ്യോഗസ്ഥരും ജില്ല കലക്ടറും ഭൂമി പരിശോധന നടത്തുന്നത്. വിദഗ്ധ സമിതിയുടെ പരിശോധനക്കുശേഷം ജനുവരി 22ന് സര്‍ക്കാറിന് റിപ്പോര്‍ട്ട് നല്‍കുമെന്ന് ജില്ല കലക്ടര്‍ ഡോ. അദീല അബ്ദുള്ള പറഞ്ഞു.