ആയിരം പേര്‍ക്ക് ഡിജിറ്റല്‍ ഹിയറിങ് എയ്ഡുകള്‍ നല്‍കുന്ന ശ്രവണ്‍ പദ്ധതിക്ക് ഇന്ന് തുടക്കമായി. സഹായ ഉപകരണങ്ങള്‍ ആവശ്യമായ സംസ്ഥാനത്തെ മുഴുവന്‍ ഭിന്നശേഷിക്കാര്‍ക്കും സഹായ ഉപകരണം ലഭ്യമാക്കുമെന്ന് ആരോഗ്യ സാമൂഹ്യനീതി വകുപ്പ് മന്ത്രി കെ കെ െൈശലജ ടീച്ചര്‍ പറഞ്ഞു. ശുഭ യാത്ര, കാഴ്ച തുടങ്ങിയവ ഇത്തരത്തിലുള്ള ശ്രദ്ധേയ പദ്ധതികളാണ്. കേള്‍വി പരിമിതി നേരിടുന്ന ആയിരം പേര്‍ക്ക് ഈ വര്‍ഷം ഇയര്‍ മോള്‍ഡോടുകൂടിയ ഡിജിറ്റല്‍ ഹിയറിങ്ങ് എയ്ഡുകള്‍ വിതരണം ചെയ്യുന്ന വികലാംഗ ക്ഷേമ കോര്‍പ്പറേഷന്റെ ശ്രവണ്‍ പദ്ധതിയുടെ സംസ്ഥാനതല ഉദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി.അതിനാവശ്യമായ തുക വികലാംഗ ക്ഷേമ കോര്‍പ്പറേഷന്‍ നല്‍കുന്നതാണ്.
ശ്രവണ സഹായികള്‍ക്കായി നിരവധി അപേക്ഷകള്‍ ലഭിച്ചുകൊണ്ടിരിക്കുന്ന സാഹചര്യത്തിലാണ് അടിയന്തരമായി ഗുണനിലവാരമുള്ള ഡിജിറ്റല്‍ ശ്രവണ സഹായികള്‍ വിതരണം ചെയ്യാന്‍ തീരുമാനിച്ചത്. സംസ്ഥാനത്തെ ഭിന്നശേഷിക്കാര്‍ക്ക് സഹായകമായ നിരവധി നൂതന സഹായ ഉപകരണങ്ങളാണ് വികലാംഗക്ഷേമ കോര്‍പ്പറേഷന്‍ സൗജന്യമായി വിതരണം ചെയ്തു വരുന്നത്. വിവിധ ജില്ലകളില്‍ പ്രത്യേക ക്യാമ്പുകള്‍ നടത്തി മറ്റുള്ളവര്‍ക്ക് ശ്രവണസഹായികള്‍ വിതരണം ചെയ്യുന്നതാണ്.