സംസ്ഥാനത്ത് മദ്യവില വർധിപ്പിക്കേണ്ട സാഹചര്യം ഉണ്ടെന്ന് എക്സൈസ് മന്ത്രി ടി പി രാമകൃഷ്ണൻ. വില വർധിപ്പിക്കുന്ന കാര്യം ബിവറേജസ് കോർപ്പറേഷൻ ആലോചിക്കുകയാണെന്നും അടിസ്ഥാന വിലയില് 7 ശതമാനം വർധനയാണ് ഇപ്പോൾ നിർദ്ദേശം വന്നിരിക്കുന്നതെന്നും മന്ത്രി പറഞ്ഞു.
മദ്യവിലയുടെ കാര്യത്തില് ബെവ്കോയുടെ തീരുമാനം സര്ക്കാര് ഉടന് അംഗീകരിക്കുമെന്നാണ് സൂചന. ആനുപാതികമായി നികുതിയും കൂടുന്നതോടെ മദ്യത്തിന് ലിറ്ററിന് നൂറു രൂപയെങ്കിലും വില വര്ദ്ധന ഉണ്ടാകും. മദ്യം ഉത്പാദിപ്പിക്കുന്നതിനുള്ള എക്സട്രാ ന്യൂട്രല് ആല്ക്കഹോളിന്റെ വില കണക്കിലെടുത്താണ് ബിവറേജസ് കോര്പ്പറേഷന് മദ്യം വാങ്ങുന്നതിനുള്ള കരാര് ഉറപ്പിക്കുന്നത്. സ്പിരിറ്റിന് ലിറ്ററിന് 35 രൂപ വിലയുണ്ടായിരുന്നപ്പോള് ഉറപ്പിച്ച ടെണ്ടറനുസരിച്ചാണ് ഇപ്പോഴും ബെവ്കോക്ക് മദ്യം ലഭിക്കുന്നത്. എന്നാല് സ്പിരിറ്റിന് ലിറ്ററിന് 60 രൂപ കടന്നിട്ടും കമ്പനികളില് നിന്നും വാങ്ങുന്ന മദ്യത്തിന് വില കൂട്ടിയിരുന്നില്ല.
കഴിഞ്ഞ ദിവസം ചേര്ന്ന ബെവ്കോ ഡയറക്ടര് ബോര്ഡ് യോഗമാണ് വിതരണക്കാരില് നിന്നും മദ്യം വാങ്ങുന്നതിനുള്ള അടിസ്ഥാന വിലയില് 7 ശതമാനം വര്ദ്ധനക്ക് തീരുമാനമെടുത്തത്.
വിതരണക്കാരുടെ തുടര്ച്ചയായ നിവേദനങ്ങളുടെ പശ്ചാത്തലത്തില് പോയവര്ഷം രണ്ട് തവണ ടെണ്ടര് പുതുക്കാന് നടപടി തുടങ്ങിയെങ്കിലും കൊവിഡ് കണക്കിലെടുത്ത് നീട്ടിവെയ്ക്കുകയായിരുന്നു. അതിനിടെ കൊവിഡ് കാലത്തെ വരുമാന നഷ്ടം കണക്കിലെടുത്ത് മദ്യത്തിന്റെ എക്സൈസ് നികുതി 35 ശതമാനം ഉയര്ത്തുകയും ചെയ്തു.