കിളികൊല്ലൂര്‍ പോലീസ് സ്റ്റേഷനിലെ മര്‍ദ്ദന ദൃശ്യങ്ങള്‍ സമൂഹ മാധ്യമങ്ങളിലൂടെ പുറത്തായതിന് പിന്നില്‍ പോലീസുകാര്‍ക്കിടയിലെ ഭിന്നതയെന്ന് സൂചന. ആരോപണവിധേയനായ ഗ്രേഡ് എസ്ഐ പ്രകാശ് ചന്ദ്രനെ ഒറ്റപ്പെടുത്തി ഉന്നത പൊലീസ് ഉദ്യോഗസ്ഥനെ രക്ഷിച്ചെടുക്കാനുള്ള ശ്രമങ്ങളാണ് പിന്നണിയില്‍ നടന്നതെന്നാണ് സൂചന. ആദ്യം പോലീസുകാരന്‍ സൈനികനെ മര്‍ദിക്കുന്ന വീഡിയോ ആണ് പ്രചരിച്ചത്. ഇത് പോലീസിന് തിരിച്ചടിയായെന്നും സേനക്കുള്ളില്‍ മുറുമുറുപ്പുണ്ട്.അതേ സമയം സൈനികനും സഹോദരനും ക്രൂരമര്‍ദനമേറ്റ സംഭവത്തെ വീണ്ടും ന്യായീകരിക്കാനുള്ള ശ്രമങ്ങളാണ് പോലീസ് നടത്തി വരുന്നത്. സ്റ്റേഷനില്‍ വച്ച് യുവാക്കളെ കീഴ്‌പ്പെടുത്തിയത് രക്ഷപെടാതിരിക്കാനെന്ന വിചിത്ര ന്യായീകരണമുന്നയിക്കുകയാണ് പോലീസ്. സൈനികനും സഹോദരനും സ്റ്റേഷന് അകത്തു കയറി സ്റ്റേഷന് റൈറ്ററുടെ തലയടിച്ചു പൊട്ടിക്കുകയും മൂക്കിന്റെ പാലം തകര്‍ക്കുകയും ചെയ്തു എന്നാണ് പ്രചാരണം. പ്രതികളെ ബലം പ്രയോഗിച്ച് കീഴ്പ്പെടുത്തുക മാത്രമാണ് ചെയ്തതെന്ന് പൊലീസ് പറയുന്നു. സസ്‌പെന്‍ഷനിലായ എസ്.ഐ അനീഷിന്റെ ശബ്ദ സന്ദേശമാണ് വാട്സ്ആപ്പ് ഗ്രൂപ്പുകളിലൂടെ പുതുതായി പുറത്ത് വന്നത്. പ്രതികളായ യുവാക്കള്‍ ഡ്യൂട്ടിയില്‍ ഉണ്ടായിരുന്നവരെ മര്‍ദ്ദിച്ചെന്നും എസ്.ഐ അനീഷ് പറയുന്നു. സംഭവ സമയത്ത് സ്റ്റേഷനില്‍ സിഐയും എസ്.ഐയും ഇല്ലായിരുന്നുവെന്നും ഇയാള്‍ അവകാശപ്പെടുന്നു. അതേസമയം പൊലീസ് സ്റ്റേഷനിലെ മുഴുവന്‍ സിസിടിവി ദൃശ്യങ്ങളും വേണമെന്ന ആവശ്യവുമായി പരാതിക്കാരന്‍ വിഘ്നേഷ് രംഗത്തെത്തിയിട്ടുണ്ട്.