സ്വര്‍ണക്കടത്ത് നടന്നത് ശിവശങ്കറിന്റെ ഒത്താശയോടെയാണെന്നും കള്ളക്കടത്തു വഴി ലഭിക്കുന്ന വരുമാനം എവിടെ നിക്ഷേപിക്കണമെന്ന് നിര്‍ദേശിച്ചത് ശിവശങ്കറാണെന്നും ഇ ഡി വ്യക്തമാക്കി.എം ശിവശങ്കറിനെതിരായ കൂടുതല്‍ തെളിവുകള്‍ ഇ ഡി കോടതിക്ക് കൈമാറി. ഇത് വ്യക്തമാക്കുന്ന വാട്‌സ് ആപ്പ് ചാറ്റുകളും കൈമാറിയിട്ടുണ്ട്.
നയതന്ത്രബാഗ് പരിശോധനയില്ലാതെ വിട്ട് കിട്ടാന്‍ മുതിര്‍ന്ന കസ്റ്റംസ് ഓഫിസറെ വിളിച്ചതായി ശിവശങ്കര്‍ സമ്മതിച്ചു.സ്വപ്‌ന ആവശ്യപ്പെട്ടതു കൊണ്ടാണ് വിളിച്ചതെന്നും മൊഴി നല്‍കിയിരുന്നു. നയതന്ത്ര ചാനലിലൂടെ സ്വര്‍ണമടങ്ങിയ ബാഗ് വിട്ടുകിട്ടാന്‍ ശിവശങ്കര്‍ സജീവമായി ഇടപെട്ടിട്ടുണ്ടെന്നും ഇതിലൂടെ ശിവശങ്കര്‍ ഔദ്യോഗിക പദവി ദുരുപയോഗം ചെയ്തുവെന്നും ഇ.ഡി ചൂണ്ടിക്കാട്ടി.
സ്വപ്നയ്ക്ക് ലൈഫ് മിഷന്റെ പദ്ധതി രേഖകള്‍ കൈമാറിയത് ടെന്‍ഡര്‍ രേഖകള്‍ തുറക്കുന്നതിന് മുമ്പാണ്. ബിഡ് നടപടികളിലെ വിശ്വാസ്യതയെ തന്നെ ചോദ്യം ചെയ്യുന്നതാണ് ശിവശങ്കറിന്റെ ഈ നടപടിയെന്നും ഡയറക്ടറേറ്റ് വിമര്‍ശിച്ചു.