പ്രധാനമന്ത്രി നരേന്ദ്ര മോദി രാഷ്ട്രപതി രാം നാഥ് കോവിന്ദുമായി കൂടിക്കാഴ്ച നടത്തി. യുക്രൈനിൽ നടക്കുന്ന നിലവിലെ സാഹചര്യങ്ങളെക്കുറിച്ചും സർക്കാർ സ്വീകരിക്കുന്ന നടപടികളെക്കുറിച്ചും രാഷ്ട്രപതിയെ ധരിപ്പിച്ചു. സംഘർഷഭരിതമായ യുക്രൈനിൽ നിന്ന് വിദ്യാർത്ഥികളെയും പൗരന്മാരെയും തിരികെ എത്തിക്കാനുള്ള ഇന്ത്യയുടെ ശ്രമങ്ങൾക്കിടയിലാണ് കൂടിക്കാഴ്ച നടത്തിയത്. യുക്രൈനിൽ കുടുങ്ങിയ ഇന്ത്യക്കാർ സുരക്ഷിതരാണെന്ന് ഉറപ്പാക്കാൻ സർക്കാർ സംവിധാനങ്ങൾ 24 മണിക്കൂറും പ്രവർത്തിക്കണമെന്ന് പ്രധാനമന്ത്രി നേരത്തെ ആവശ്യപ്പെട്ടിരുന്നു. പ്രധാനമന്ത്രി അധ്യക്ഷത വഹിച്ച ഉന്നതതല യോഗത്തിലാണ് ഇക്കാര്യം ആവശ്യപ്പെട്ടതെന്ന് വിദേശകാര്യ മന്ത്രാലയ വക്താവ് അറിയിച്ചിരുന്നു. യുക്രൈനിലെ സാഹചര്യത്തെക്കുറിച്ച് പ്രധാനമന്ത്രിയുടെ അധ്യക്ഷതയിൽ നടക്കുന്ന രണ്ടാമത്തെ ഉന്നതതല യോഗമാണിത്.
