സംസ്ഥാനത്ത് ബസ് ചാര്‍ജ് വർധന സംബന്ധിച്ച് ജസ്റ്റിസ് രാമചന്ദ്രന്‍ കമ്മിറ്റിയുമായി ഗതാഗതമന്ത്രി ആന്റണി രാജു ചര്‍ച്ച നടത്തും. ഡിസംബര്‍ ഒൻപതിന് വൈകുന്നേരം നാല് മണിക്ക് തൈക്കാട് ഗവണ്‍മെന്റ് ഗസ്റ്റ് ഹൗസിൽ വെച്ചാണ് ചർച്ച നടത്തുക.
നേരത്തെ ഇന്ധന വില വർധനവിന്റെ അടിസ്ഥാനത്തില്‍ സ്വകാര്യ ബസുടമകളുടെ സംഘടനാ പ്രതിനിധികളുമായി നടത്തിയ ചര്‍ച്ചയെ തുടര്‍ന്ന് ചാര്‍ജ് വർധിപ്പിക്കുവാന്‍ തീരുമാനിച്ചിരുന്നു. വിദ്യാര്‍ത്ഥി സംഘടനകളുമായും ഗതാഗത മന്ത്രി ചര്‍ച്ച നടത്തി. ഇക്കാര്യത്തില്‍ അഭിപ്രായം ആരായുന്നതിനാണ് ബസ് നിരക്ക് നിർദേശിക്കാൻ ചുമതലപ്പെടുത്തിയിട്ടുള്ള കമ്മിറ്റിയുമായി ഗതാഗതമന്ത്രി ആന്റണി രാജു ചര്‍ച്ച നടത്തുന്നത്.
