തിരുവനന്തപുരം: അന്തരിച്ച സിനിമാ സീരിയല്‍ നടന്‍ ഷാനവാസിന് കലാകേരളം ഇന്ന് വിട നല്‍കും. വൈകീട്ട് 5 മണിക്ക് പാളയം മുസ്ലീം ജമാഅത്ത് ഖബര്‍സ്ഥാനിലാണ് സംസ്കാരം. മലയാളത്തിന്റെ നിത്യഹരിത നായകനായ പ്രേംനസീറിന്റെ മകനായ ഷാനവാസ് ഇന്നലെ രാത്രി 11.50-ഓടെ തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്തരിച്ചത്. വൃക്ക- ഹൃദയ സംബന്ധമായ രോഗങ്ങളെ തുടര്‍ന്ന് ചികിത്സയിലിരിക്കെയാണ് മരണം
ഷാനവാസ് മലയാളം, തമിഴ് ഭാഷകളിലായി നൂറോളം സിനിമകളില്‍ അഭിനയിച്ചിട്ടുണ്ട്. 1981ല്‍ ബാലചന്ദ്രമേനോന്‍ സംവിധാനം ചെയ്ത പ്രേമഗീതങ്ങള്‍ എന്ന ചിത്രത്തിലൂടെയാണ് സിനിമാ രംഗത്തേക്ക് കാലെടുത്ത് വെച്ചത്. നായക- വില്ലന്‍ വേഷങ്ങളില്‍ സജീവ സാന്നിധ്യമായി തിളങ്ങിയിരുന്ന നടനായിരുന്നു ഷാനവാസ്. ഒരു കാലത്ത് അഭിനയത്തില്‍ നിന്ന് നീണ്ട ഇടവേളയെടുത്തിരുന്നു. തുടര്‍ന്ന് വിദേശത്ത് ഒരു ഷിപ്പിങ് കമ്പനിയില്‍ മാനേജറായി ജോലി നോക്കി. പിന്നീട് സീരിയലിലേക്കും, സിനിമയിലേക്കും തിരിച്ചെത്തി. 2011ല്‍ പുറത്തിറങ്ങിയ ചൈനാ ടൗണ്‍ എന്ന ചിത്രത്തിലൂടെയാണ് വീണ്ടും സിനിമാ രംഗത്തേക്ക് തിരിച്ചെത്തിയത്. 2022 ല്‍ പുറത്തിറങ്ങിയ ജനഗണമനയാണ് അവസാനമായി അഭിനയിച്ച സിനിമ.
About the Author
