കോട്ടയം: റാഗിംഗിന്‍റെ പേരില്‍ നഴ്സിംഗ് കോളേജില്‍ ജൂനിയർ വിദ്യാർത്ഥികള്‍ക്ക് നേരെ നടന്നത് കൊടുംക്രൂരത. കോട്ടയം ഗാന്ധിനഗർ സ്കൂൾ ഓഫ് നഴ്സിംഗ് കോളേജിലാണ് 6 വിദ്യാർത്ഥികൾ ക്രൂര റാഗിംഗിന് ഇരയായത്. ഒന്നാം വർഷ വിദ്യാർഥികളെ നഗ്നരാക്കിയ ശേഷം പ്രതികൾ ദൃശ്യങ്ങൾ പകർത്തി. കോമ്പസ് ഉപയോഗിച്ച് ശരീരത്ത് മുറിവുകൾ ഉണ്ടാക്കി, ബോഡി ലോഷൻ തേച്ച് പീഡിപ്പിച്ചു. മദ്യം വാങ്ങാൻ പ്രതികൾ സ്ഥിരമായി തങ്ങളോട് പണം വാങ്ങുമായിരുന്നെന്നും പരാതിക്കാരായ വിദ്യാര്‍ത്ഥികള്‍ മൊഴി നല്‍കി.
സംഭവത്തിൽ 5 സീനിയര്‍ വിദ്യാർത്ഥികളെയാണ് പൊലീസ് അറസ്റ്റ് ചെയ്തത്. കോട്ടയം മൂന്നിലവ്‍ സ്വദേശി സാമുവൽ, വയനാട് നടവയൽ സ്വദേശി ജീവ, മലപ്പുറം മഞ്ചേരി സ്വദേശി റിജിൽ ജിത്ത്, മലപ്പുറം വണ്ടൂർ സ്വദേശി രാഹുൽ രാജ്, കോട്ടയം കോരുത്തോട് സ്വദേശി വിവേക് എന്നിവരാണ് കസ്റ്റഡിയിലുള്ളത്. മൂന്ന് മാസത്തോളം റാഗ് ചെയ്തെന്നാണ് പരാതിയിലുള്ളത്. വിദ്യാർത്ഥികളുടെ സ്വകാര്യ ഭാഗങ്ങളിൽ ഡംബൽ തൂക്കിയിട്ട് ഉപദ്രവിച്ചെന്നും പരാതിയിൽ പറയുന്നു. കോളേജിലെ ആന്റി റാഗിംഗ് സെൽ വഴിയാണ് പൊലീസിന് പരാതി കൈമാറിയത്