കുറ്റ്യാടി: വായ്പാ ആപ്പിന്റെ നിരന്തരമായ ഭീഷണിയെ തുടര്‍ന്ന് കോഴിക്കോട് കുറ്റ്യാടിയിൽ വീണ്ടും ആത്മഹത്യാശ്രമം. 25കാരിയാണ് ജീവനൊടുക്കാന്‍ ശ്രമിച്ചത്. യുവതിയെ മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്. രണ്ടായിരം രൂപ വായ്പയെടുത്ത യുവതി ഒരു ലക്ഷം തിരിച്ചടച്ചിട്ടും ആപ്പുകാര്‍ ഭീഷണിപ്പെടുത്തുകയും യുവതിയുടെ മോര്‍ഫ് ചെയ്ത നഗ്‌ന ചിത്രങ്ങള്‍ ഫോണിലേക്ക് അയക്കുകയും ചെയ്തുവെന്നും യുവതി വ്യക്തമാക്കി.
സ്വര്‍ണം പണയം വച്ചാണ് താന്‍ പണം തിരിച്ചടച്ചതെന്ന് യുവതി പറയുന്നു. മോര്‍ഫ് ചെയ്ത ചിത്രങ്ങള്‍ ബന്ധുക്കള്‍ക്ക് അയയ്ക്കുമെന്നും സമൂഹ മാധ്യമങ്ങളില്‍ പങ്കുവയ്ക്കുമെന്നും ഇവര്‍ ഭീഷണിപ്പെടുത്തിയതോടെയാണ് ജീവനൊടുക്കാന്‍ ശ്രമിച്ചതെന്നും യുവതി മൊഴി നല്‍കി.