സൈബർ തട്ടിപ്പിലൂടെ ഒരു ലക്ഷം രൂപ നഷ്ടമായതായി പരാതി നൽകി നടിയും കോൺഗ്രസ് നേതാവുമായ നഗ്മ. മൊബൈലിൽ ഫോണിൽ വന്ന എസ് എം എസ് ലിങ്കിൽ ക്ലിക്ക് ചെയ്തതോടെയാണ് നഗ്മയ്ക്ക് പണം നഷ്ടമായത്.ബാങ്കുകൾ അയച്ചതിന് സമാനമായ സന്ദേശമാണ് തനിക്ക് ലഭിച്ചതെന്ന് നഗ്മ പറഞ്ഞു. ലിങ്കിൽ ക്ലിക്ക് ചെയ്തയുടൻ ഒരാൾ തന്നെ വിളിച്ചു. കെ‌വൈ‌സി അപ്ഡേറ്റ് പൂർത്തിയാക്കാൻ സഹായിക്കാമെന്ന് പറഞ്ഞാണ് ഇയാൾ വിളിച്ചത്. എന്നാൽ താൻ യാതൊരു വിവരങ്ങളും ലിങ്കിൽ പങ്കുവെച്ചില്ലെന്നും താരം പറഞ്ഞു. ‘എനിക്ക് ഒന്നിലധികം ഒടിപികൾ ലഭിച്ചു, ഭാഗ്യവശാൽ, എനിക്ക് വലിയ തുക നഷ്‌ടമായില്ല’ എന്നും നഗ്മ മാധ്യമങ്ങളെ അറിയിച്ചു.
നഗ്മയെ കൂടാതെ അവതാരക ശ്വേതാ മേമൻ ഉൾപ്പടെ 80-ഓളം പേരാണ് കഴിഞ്ഞ ഏതാനം ദിവസങ്ങൾക്കിടയിൽ തട്ടിപ്പിനിരയായത്. ശ്വേത മേമന്‍റെ 57,636 രൂപയാണ് നഷ്ടമായത്. ഇവർ പൊലീസിൽ പരാതി നൽകുകയും ചെയ്തിരുന്നു. തന്‍റെ ഇന്‍റർനെറ്റ് ബാങ്കിങ് ഐഡിയും പാസ്വേർഡും ഇവർ വെബ്സൈറ്റിൽ കൊടുത്തിരുന്നു. ഇതിന് പിന്നാലെ ബാങ്കിൽ നിന്നെന്ന് പറഞ്ഞ് ഫോൺ കാൾ വന്നു. കെ.വൈ.സി അപ്ഡേറ്റ് ചെയ്യാനായി ഒടിപി വേണമെന്ന് ആവശ്യപ്പെട്ടു. ഒടിപി കൊടുത്തതും പണം നഷ്ടമായെന്ന മെസേജാണ് വന്നതെന്ന് ശ്വേത മേമന്‍റെ പരാതിയിൽ പറയുന്നു.