104-ാം വയസ്സിൽ സാക്ഷരതാപരീക്ഷ വിജയിച്ചു താരമായ കുട്ടിയമ്മ കോന്തി 106-ാം വയസ്സിൽ വിമാനയാത്രയ്ക്കു തയാറെടുക്കുന്നു. ഡൽഹി സർക്കാരിന്റെ മാർച്ച് 11 നടക്കുന്ന വനിതാദിനാഘോഷത്തിൽ പങ്കെടുക്കാനാണു കുട്ടിയമ്മയ്ക്ക് അവസരം ലഭിച്ചിരിക്കുന്നത്. ഇന്നലെ ഇവർക്കുള്ള വിമാനടിക്കറ്റ് ലഭിച്ചപ്പോൾ കുട്ടിയമ്മയ്ക്കു നിറഞ്ഞ പുഞ്ചിരി.
കഴിഞ്ഞ ദിവസമാണു വീട്ടിലേക്കു ഡൽഹി സർക്കാരിൽ നിന്നു വിളി എത്തിയത്. 11നാണു വനിതാദിനാഘോഷം എന്നും കുട്ടിയമ്മയെ പങ്കെടുപ്പിക്കണം എന്നുമായിരുന്നു നിർദേശം. കുട്ടിയമ്മ കൊച്ചുമകൻ എം.ജി.ബിജു, ഭാര്യ രജനി എന്നിവർക്കുള്ള വിമാനടിക്കറ്റ് അയച്ചുനൽകി. നാളെ 2.30നു ജീവിതത്തിൽ ആദ്യമായി കുട്ടിയമ്മ കോന്തി വിമാനത്തിൽ കയറും. 11നു രാവിലെ 10.30നാണു ഡൽഹിയിലെ പരിപാടി. തിരിച്ചു 11ന് 6.30നു വിമാനത്തിൽ മടങ്ങും.
അയർക്കുന്നം പഞ്ചായത്തിൽ 2 വർഷം മുൻപു നടത്തിയ സാക്ഷരതാപരീക്ഷയിലാണ് 100ൽ 89 മാർക്കു നേടി തിരുവഞ്ചൂർ തട്ടാംപറമ്പിൽ കുട്ടിയമ്മ കോന്തി താരമായത്. പതിനാറാം വയസ്സിലായിരുന്നു കുട്ടിയമ്മയുടെ വിവാഹം. ഭർത്താവ് ടി.കെ.കോന്തി 2002ൽ മരിച്ചു. സാക്ഷരതാപഠനത്തിലൂടെ 106-ാം വയസ്സിൽ വിമാനയാത്രയുടെ ഭാഗ്യം കൂടി എത്തിയ സന്തോഷത്തിലാണു കുട്ടിയമ്മയുടെ കുടുംബവും.