ഓരോ ആളുകൾക്കും പലതരത്തിലുള്ള സാധനങ്ങളോടാണ് ഇഷ്ടം. എന്നാൽ, ആരും ചിന്തിക്കാത്ത ഒരു സാധനത്തോടാണ് ഷിക്കാഗോ നിവാസിയായ കേശ എന്ന 34 കാരിക്ക് പ്രിയം. യുവതിക്ക് ടോയ്ലറ്റ് പേപ്പറുകളോട് അടങ്ങാത്ത ആസക്തി ആണ് ഉള്ളത്. ഒരു ദിവസം ഇവർ 75 ഷീറ്റ് ടോയ്ലറ്റ് പേപ്പറുകൾ വരെ കഴിക്കുമെന്നാണ് മകളെക്കുറിച്ച് കേശയുടെ അമ്മ പറയുന്നത്. സ്വയം നിയന്ത്രിക്കാൻ സാധിക്കാത്ത വിധം ടോയ്ലറ്റ് പേപ്പറുകളോടുള്ള ഇഷ്ടം തന്‍റെ മകളെ പിടികൂടിയിരിക്കുകയാണെന്നും അമ്മ പറയുന്നു. വിചിത്രമാണെങ്കിലും ഇതൊരു രോഗാവസ്ഥയാണെന്നാണ് വിദഗ്ധർ അഭിപ്രായപ്പെടുന്നത്. സൈലോഫാഗിയ എന്നൊരു രോഗാവസ്ഥയിലൂടെ കടന്ന് പോകുന്നതിനാലാണ് ഇത്തരത്തിൽ ഒരു ആസക്തിക്ക് ഇവർ അടിമയായിരിക്കുന്നത്. കുട്ടിക്കാലത്ത് അമ്മയെ പിരിഞ്ഞ് മുത്തശ്ശിയോടും ആന്‍റിയോടും ഒപ്പം നിൽക്കേണ്ടി വന്ന സാഹചര്യം തന്‍റെ ജീവിതത്തിൽ വലിയ മാനസിക സമ്മർദ്ദം സൃഷ്ടിച്ചിരുന്നുവെന്നും അതിൽ നിന്നുമാണ് താൻ ഇത്തരത്തിൽ ഒരു ശീലത്തിന് അടിമയായി തീർന്നതെന്നുമാണ് യുവതി പറയുന്നത്. ചെറുപ്പം മുതൽ തന്നെ ടോയ്ലറ്റ് പേപ്പറുകൾ താൻ കഴിക്കാറുണ്ടെങ്കിലും ഇതുവരെയും തനിക്ക് യാതൊരു വിധത്തിലുള്ള ശാരീരിക ബുദ്ധിമുട്ടുകളും അതുമൂലം ഉണ്ടായിട്ടില്ലെന്നും ഇവർ പറയുന്നു. ഈ രീതി മാറ്റാൻ ശ്രമിച്ചെങ്കിലും തന്നെക്കൊണ്ട് അതിന് സാധിക്കുന്നില്ലെന്നാണ് കേശ പറയുന്നത്.