ബിബിസി തയ്യാറാക്കിയ ‘ഇന്ത്യ: ദി ക്വസ്റ്റ്യന്‍’ എന്ന ഡോക്യുമെന്ററി സംസ്ഥാന വ്യാപകമായി പ്രദര്‍ശിപ്പിക്കുമെന്ന് ഡിവൈഎഫ്ഐ സംസ്ഥാന സെക്രട്ടറി വി കെ സനോജ്. സംഘർഷം ഉണ്ടാക്കുകയല്ല ലക്ഷ്യം. ജനാധിപത്യ സമൂഹമെന്ന നിലയിൽ ആശയ സംവാദത്തിന് അവകാശമുണ്ടെന്നും വി കെ സനോജ് പറഞ്ഞു.‘ലോകത്തിന്റെ വിവിധ ഇടങ്ങളിൽ പ്രദർശിപ്പിച്ച ഡോക്യുമെന്ററി അതിനകത്ത് പ്രത്യേകിച്ച് മത വിദ്വേഷം ഉണ്ടാക്കുന്ന തരത്തിൽ ഒന്നും തന്നെയില്ല. ഗുജറാത്തിൽ ഭരണകൂടത്തിന് നേരെ നടത്തിയിട്ടുള്ള കലാപത്തിന്റെ വിശദാംശങ്ങൾ മാധ്യമങ്ങൾ അന്വേഷണം നടത്തുന്നു അത് ജനങ്ങൾക്ക് മുന്നിൽ പറയുന്നു. അതിൽ സംഘർമുണ്ടാക്കേണ്ട കാര്യമില്ല. സത്യം എത്ര മൂടിവെക്കാന്‍ ശ്രമിച്ചാലും ജനങ്ങള്‍ക്ക് മുന്നില്‍ തുറന്ന് കാണിക്കും. പ്രദര്‍ശിപ്പിക്കുന്നത് രാജ്യ വിരുദ്ധ പ്രവര്‍ത്തനമായി കാണേണ്ടതില്ലെന്നും വി കെ സനോജ് പറഞ്ഞു. കേരളത്തിലെ ക്യാമ്പസുകളില്‍ പ്രദര്‍ശിപ്പിക്കുമെന്ന് എസ് എഫ് ഐയും ആഹ്വാനം ചെയ്തിരുന്നു. കണ്ണൂരിലും കൊച്ചിയിലുമാണ് ഇന്ന് ചിത്രം പ്രദർശിപ്പിക്കുക. ജെ എന്‍ യു യൂണിവേഴ്‌സിറ്റിയിലും യൂണിയന്റെ നേതൃത്വത്തില്‍ ഡോക്യുമെന്ററി പ്രദര്‍ശിപ്പിക്കുന്നുണ്ട്. അതേസമയം ഡോക്യുമെന്ററി പ്രദര്‍ശിപ്പിച്ചാല്‍ കര്‍ശന അച്ചടക്ക നടപടി സ്വീകരിക്കുമെന്ന് ജെ എന്‍ യു അധികൃതര്‍ വ്യക്തമാക്കിയിരുന്നു.