കണ്ണൂരിൽ സ്കൂൾ വിദ്യാർത്ഥിനിയുടെ നഗ്ന ദൃശ്യങ്ങൾ മൊബൈലിൽ പകർത്തി പ്രചരിപ്പിച്ച പ്ലസ് ടു വിദ്യാർത്ഥി അറസ്റ്റിൽ. കണ്ണൂർ കേളകം പോലീസ് സ്റ്റേഷൻ പരിധിയിലാണ് സംഭവം. ദൃശ്യങ്ങൾ പുറത്ത് വിടുമെന്ന് ഭീഷണിപ്പെടുത്തി ആഭരണങ്ങൾ തട്ടിയെടുത്തതായും പരാതിയുണ്ട്. അതേസമയം പ്രതിയും ഇരയും പ്രായപൂർത്തിയായിട്ടില്ല. ജുവനൈൽ കോടതിയിൽ ഹാജരാക്കിയ പ്രതിയെ ജുവനൈൽ ഹോമിലേക്ക് മാറ്റി. പെൺകുട്ടിയെ ഭീഷണിപ്പെടുത്തി സ്വർണ ചെയിനും പ്ലസ് ടു വിദ്യാർത്ഥിയായ പ്രതി കൈക്കലാക്കിയിരുന്നു. ഇവർ തമ്മിൽ നേരത്തേ സൗഹൃദമുണ്ടായിരുന്നു. ആ സൗഹൃദം മുതലെടുത്താണ് വിദ്യാർത്ഥി ദൃശ്യങ്ങൾ പകർത്തിയതും ഇരയെ ഭീഷണിപ്പെടുത്തി സ്വർണം കവർന്നതും. മറ്റ് ചില പരാതികളും പ്രതിക്കെതിരെ വന്നിട്ടുണ്ട്. വിദ്യാർത്ഥിക്ക് ആരെങ്കിലും സഹായം നൽകിയിട്ടുണ്ടോ എന്ന കാര്യം പൊലീസ് പരിശോധിക്കുകയാണ്. മറ്റ് വിദ്യാർത്ഥികളെ ഭീഷണിപ്പെടുത്താനും പ്രതി ശ്രമിച്ചിട്ടുണ്ടെന്നും പറയുന്നു.