അർജന്റീന ലോക ചാമ്പ്യന്മാരായതുമുതൽ അതിരില്ലാത്ത ആഹ്ലാദത്തിലും വിജയാഘോഷങ്ങളിലുമാണ് ലോകം മുഴുവനുമുള്ള അര്‍ജന്റീന ആരാധകർ. സന്തോഷം എങ്ങനെയെല്ലാം പ്രകടിപ്പിക്കാമോ അതെല്ലാം അവർ ചെയ്യുന്നു. എന്നാല്‍ ലോകകപ്പ് ഫൈനൽ മത്സരം നടന്ന ലുസെയ്‌ൽ സ്റ്റേഡിയത്തില്‍ ഒരു ആരാധിക നടത്തിയ ആഹ്ലാദപ്രകടനം ആളുകളെ അമ്പരപ്പിച്ചിരിക്കുകയാണ് . ഗോൺസാലോ മൊണ്ടിയിലിന്റെ പെനാൽറ്റി കിക്കിൽ വിജയത്തിനരികെ അര്‍ജന്റീന എത്തിയപ്പോൾ ആവേശത്തിൽ ക്യാമറയ്ക്ക് മുൻപിൽ വിവസ്ത്രയായി അർജന്റീനൻ ആരാധിക. ബ്രിട്ടിഷ് മാധ്യമമായ ബിബിസിയാണ് ഇവരുടെ ദൃശ്യം പുറത്തുവിട്ടത്.
എന്നാൽ ഖത്തറിലെ കർശന നിയമങ്ങള്‍ ആരാധികയ്ക്ക് വിനയായിരിക്കുകയാണ്. ശരീരപ്രദർശനം നടത്തിയാൽ പിഴ ചുമത്തുകയോ ജയിലിൽ അടയ്ക്കുകയോ ചെയ്യാൻ നിയമമുള്ള രാജ്യമാണ് ഖത്തർ. രാജ്യത്തെ സംസ്കാരത്തെയും നിയമങ്ങളെയും അനുസരിക്കണമെന്ന് ലോകകപ്പ് തുടങ്ങുന്നതിന് മുന്നേ തന്നെ ഖത്തർ ഭരണകൂടം കാണികൾക്ക് കർശന നിര്‍ദേശം നൽകിയിരുന്നു .ഒരു പരിധിക്കപ്പുറം ശരീരം പുറത്തുകാട്ടുന്ന രീതിയിലുള്ള വസ്ത്രധാരണം പാടില്ലെന്നും നിർദ്ദേശമുണ്ടായിരുന്നു .തോളുകളും കാൽമുട്ടുകളും മറയ്ക്കുന്ന രീതിയിലുള്ള വസ്ത്രധാരണം വേണമെന്നാണ് ഖത്തർ നിയമം പറയുന്നത് . കൂടാതെ സ്ത്രീകൾ ഇറുകിയ വസ്ത്രം ധരിക്കുന്നതും ഉദര ഭാഗങ്ങൾ പുറത്തു കാട്ടുന്നതും നിരോധിച്ചിരിക്കുകയാണിവിടെ .എന്നാൽ ഖത്തർ വംശീയരല്ലാത്ത സ്ത്രീകൾ ശരീരം മുഴുവൻ മൂടുന്ന പർദ്ദ ധരിക്കണമെന്നില്ല .