കേരള സർക്കാരും ഗവർണറും തമ്മിലുള്ള ശീതയുദ്ധം മുറുകിക്കൊണ്ടിരിക്കുന്ന സാഹചര്യത്തിൽ മുഖ്യമന്ത്രി
പിണറായി വിജയൻ ഇന്ന് ഡൽഹിയിൽ. ഹരിയാനയിലെ സൂരജ് കുണ്ടിൽ നടക്കുന്ന സംസ്ഥാന ആഭ്യന്തര മന്ത്രിമാരുടെ യോഗത്തിൽ പങ്കെടുക്കാനാണ് മുഖ്യമന്ത്രി ഡൽഹിയിലെത്തിയത്. ആഭ്യന്തര സുരക്ഷ അടക്കമുള്ള കാര്യങ്ങൾ, പൊലീസ് സേന നവീകരണം തുടങ്ങിയ വിഷയങ്ങൾ ആകും ആഭ്യന്തര മന്ത്രിമാരുടെ യോഗത്തിൽ ചർച്ച ചെയ്യുക. സംസ്ഥാന ആഭ്യന്തര മന്ത്രിമാരുടെ യോഗം കേന്ദ്ര ആഭ്യന്തര മന്ത്രി അമിത് ഷാ ഉദ്ഘാടനം ചെയ്യും. യോഗത്തിന് ശേഷം മുഖ്യമന്ത്രി പിണറായി വിജയൻ വിവിധ കേന്ദ്ര മന്ത്രിമാരുമായി കൂടിക്കാഴ്ചനടത്തും. മുഖ്യമന്ത്രിക്ക് പുറമേ ഗവർണർ ആരിഫ് മുഹമ്മദ് ഖാനും ഉത്തരേന്ത്യൻ സന്ദർശനം തുടരുകയാണ്. ഉത്തർപ്രദേശിലെ ബറേലിയിലുള്ള പരിപാടിയിൽ ഗവർണർ ഇന്ന് പങ്കെടുക്കും. വൈകിട്ടോടുകൂടി അദ്ദേഹം ഡൽഹിയിലേക്ക് മടങ്ങിയെത്തും.