ഒരു മത്തങ്ങക്ക് വില നാൽപ്പത്തിയേഴായിരം രൂപയോ? വിശ്വാസം വരുന്നില്ലാലെ. എന്നാൽ വിശ്വസിച്ചേ പറ്റു. ഇത്തവണത്തെ ഓണാഘോഷം ആവേശമാക്കിയ ഇടുക്കി മലയോരത്തെ കുടിയേറ്റ ഗ്രാമമായ ചെമ്മണ്ണാറിൽ നടന്ന ജനകീയ ലേലത്തിലാണ് 5 കിലോ തൂക്കം വരുന്ന മത്തങ്ങ നാൽപ്പത്തിയേഴായിരം രൂപക്ക് വിറ്റത്. സാധാരണയുള്ള ലേലം വിളിയിൽ മുട്ടനാടും പൂവൻ കോഴിയുമൊക്കെ പതിനായിരത്തിന് മുകളിൽ ലേലം വിളിച്ച് പോകാറുണ്ടെങ്കിലും മത്തങ്ങ ഇത്രയും അധികം രൂപക്ക് വിൽക്കുന്നത് ഇതാദ്യമായിട്ടാണ്. ലേലത്തിൽ മത്തങ്ങയുടെ വില ഉയർന്ന് ആയിരങ്ങളും പതിനായിരങ്ങളും കടന്നതോടെ ജനകീയ ലേലത്തിൽ പങ്കെടുക്കാൻ തടിച്ച് കൂടിയ ആളുകളിൽ ലേലം ഒരു ഹരമായി മാറി. ഒടുവിൽ സൗജന്യമായി കിട്ടിയ മത്തങ്ങ 47000 രൂപക്ക് വിറ്റുപോയി.