ഡീസൽ പ്രതിസന്ധി രൂക്ഷമായോടെ സംസ്ഥാനത്തെ കെഎസ്ആർടിസി സർവീസുകൾ വെട്ടിക്കുറച്ചു. ഇന്ന് നിരവധി സർവീസുകൾ റദ്ദാക്കി. ഓർഡിനറി സർവീസുകളാണ് നിലവിൽ വെട്ടിക്കുറച്ചിട്ടുള്ളത്. പകുതിയിലധികം സർവീസുകൾ സംസ്ഥാന വ്യാപകമായി റദ്ദാക്കിയിട്ടുണ്ട്. ഓർഡിനറി സർവീസുകൾ നാളെ 25 ശതമാനം മാത്രമേ സർവീസ് നടത്തൂ എന്ന് കെഎസ്ആർടിസി വ്യക്തമാക്കി. ഓർഡിനറി ബസ്സുകൾ ഞായറാഴ്ച പൂർണമായും നിർത്തി വയ്ക്കും. എണ്ണ കമ്പനികൾക്ക് വൻ തുക കുടിശ്ശിക ആയതിനെ തുടർന്ന് ഡീസൽ കിട്ടാതെ വന്നതാണ് രൂക്ഷമായ പ്രതിസന്ധിക്ക് കാരണം.. എണ്ണ കമ്പനികൾക്ക് 135 കോടി രൂപയാണ് കുടിശ്ശിക ഇനത്തിൽ നൽകാനുള്ളത്. ഇന്ധന പ്രതിസന്ധി തിങ്കളാഴ്ചയോ ചൊവ്വാഴ്ചയോ പരിഹരിക്കുമെന്നാണ് കെഎസ്ആർടിസിയുടെ വിശദീകരണം.