ഇന്ത്യന് രാഷ്ട്രപതിയായി സ്ഥാനമേല്ക്കുന്ന ദ്രൗപതി മുര്മുവിന് ആശംസകള് നേര്ന്ന് റഷ്യന് പ്രസിഡന്റ് വ്ലാദിമിര് പുടിന്. ഇന്ത്യയുമായുള്ള സഹകരണത്തിന് റഷ്യ സവിശേഷ പ്രാധാന്യം കല്പ്പിച്ചിട്ടുണ്ടെന്ന് സൂചിപ്പിച്ചുകൊണ്ടാണ് പുടിന് ദ്രൗപതി മുര്മുവിന് ആശംസ നേര്ന്നത്. ഇന്ത്യ- റഷ്യ രാഷ്ട്രീയ സംവാദത്തിനും സഹകരണത്തിനും ഇന്ത്യയുടെ പതിനഞ്ചാമത് രാഷ്ട്രപതി കൂടുതല് ഊന്നല് നല്കുമെന്ന് പ്രതീക്ഷിക്കുകയും ചെയ്യുന്നതായി വ്ലാദിമിര് പുടിന് പറഞ്ഞു. പരസ്പര സഹകരണത്തിലൂടെ ഇന്ത്യയ്ക്കും റഷ്യയ്ക്കും നേട്ടമുണ്ടാകുമെന്ന് പ്രതീക്ഷിക്കുന്നതായി പുടിന് പറഞ്ഞു. അതിനാല് പുതിയ പ്രസിഡന്റ് റഷ്യയുമായി കൂടുതല് സഹകരണം പ്രോത്സാഹിപ്പിക്കുമെന്ന് വിശ്വസിക്കുന്നതായും പുടിന് ആശംസയില് അറിയിച്ചു.