തലശ്ശേരി ചിറക്കരയിൽ പ്രവാസി കുടുംബത്തിൻ്റെ വീട്ടിൽ വൻ കവർച്ച നടന്നതായി പരാതി. ചിറക്കര പള്ളിത്താഴ അയ്യലത്ത് സ്കൂളിന് അടുത്ത് സി.എം.ഉസ്മാൻ റോഡിലുള്ള പ്രവാസി കുടുംബത്തിൻ്റെ ആൾ താമസമുള്ള ഇരുനില വീട്ടിൽ ടി.അബ്ദുൽ റഹ്മാൻ്റെ വീട്ടിലാണ് ഇന്ന് പുലർച്ചെ കവർച്ച നടന്നത്.15 പവൻ സ്വർണാഭരണങ്ങളും 2500 ദിർഹവും ഇന്ത്യൻ കറൻസിയും നഷ്ടപ്പെട്ടതായി അബ്ദുൽ റഹ്മാൻ്റെ മകൻ മുഹമ്മദ് സവാദ് പരാതിപ്പെട്ടു. കഴിഞ്ഞ ദിവസമാണ് വിദേശത്തുള്ള സവാദ് നാട്ടിലെത്തിയത്. ബാൽക്കണിയുടെ വാതിൽ വഴി അകത്ത് കടന്ന മോഷ്ടാവ് വീട്ടുടമയുടെ മകളും ഭർത്താവും ഉറങ്ങുന്ന മുറിയിലെ ഷെൽഫിൽ നിന്ന് എടുത്ത ബാഗിൽ നിന്നാണ് വിലപിടിപ്പുള്ള വസ്തുക്കൾ കവർന്നത്. പുലർച്ചെ 5 മണിക്ക് നിസ്കാരത്തിനായി എഴുനേറ്റപ്പോഴാണ് മുകളിലെ വാതിൽ തുറന്ന് കിടന്നതായും അകത്ത് കള്ളൻ കയറിയതായും ഇവർ തിരിച്ചറിഞ്ഞത്. രാത്രിയിൽ വാതിൽ അടച്ചതായി സവാദ് ഓർക്കുന്നില്ല. പരാതിയെ തുടർന്ന് തലശ്ശേരി പോലിസ് വീട്ടിലെത്തി അന്വേഷണം തുടങ്ങി. വീട്ടുകാരിൽ നിന്നും വിവരങ്ങൾ ശേഖരിച്ചു.