മുതിര്‍ന്ന മാധ്യമ പ്രവര്‍ത്തകന്‍ എ. സഹദേവന്‍ അന്തരിച്ചു. 71 വയസായിരുന്നു. കോട്ടയത്തെ എസ് എച്ച് ആശുപത്രിയില്‍ ചികിത്സയിലായിരുന്നു. ഇന്ത്യാവിഷന്‍, മാതൃഭൂമി അടക്കം പ്രമുഖ മാധ്യമങ്ങളില്‍ പ്രവര്‍ത്തിച്ചിട്ടുണ്ട്. ഇന്ത്യാവിഷനിലെ 24 ഫ്രെയിംസ് എന്ന പരിപാടിയുടെ അവതാരകനായിരുന്നു. കോഴിക്കോട് മാതൃഭൂമിയില്‍ നിന്നാണ് ഇന്ത്യാവിഷന്റെ അസോസിയേറ്റ് എഡിറ്റര്‍ സ്ഥാനത്തേക്ക് എത്തിയത്. മലയാള മനോരമയുടെ ജേണലിസം സ്ഥാപനമായ മാസ് കോമിന്റെ ചുമതലയിലാണ് ഒടുവില്‍ പ്രവര്‍ത്തിച്ചത്. ചലച്ചിത്ര നിരൂപകന്‍, അധ്യാപകന്‍ എന്നീ നിലകളിലും എ സഹദേവന്‍ വ്യക്തിമുദ്ര പതിപ്പിച്ചിട്ടുണ്ട്.
