കെ റെയിലിനെതിരെ ജനങ്ങൾ നടത്തുന്ന സമരത്തിന് യുഡിഎഫ് പിന്തുണ നൽകുമെന്ന് പ്രതിപക്ഷനേതാവ് വി.ഡി സതീശൻ. കെ-റെയിൽ വിഷയത്തിൽ മന്ത്രിമാരും എം.ഡിയും പറയുന്നത് പരസ്പര വിരുദ്ധമായാണ്. സജി ചെറിയാനും ഇ.പി ജയരാജനും പിണറായിയുടെ രാജസദസിലെ വിദൂഷകൻമാരാണ്. വിഷയം ആദ്യം സർക്കാരുമായി ബന്ധപ്പെട്ടവർ പഠിക്കണം. മുഖ്യമന്ത്രി ജനങ്ങളെ ഭീഷണിപ്പെടുത്തുകയാണ്. അദ്ദേഹത്തെ പാർട്ടിക്കാർക്ക് പേടിയുണ്ടാവും. നാട്ടിലുള്ളവർ എല്ലാവരും ഭയന്നാണ് നിൽക്കുന്നതെന്ന് മുഖ്യമന്ത്രി കരുതരുതെന്നും വി.ഡി സതീശൻ പറഞ്ഞു. വിമോചനസമരമെന്ന എൽഡിഎഫ് ആരോപണം പ്രതിപക്ഷനേതാവ് എതിർത്തു. ജനങ്ങളാണ് കെ റെയിലിനെതിരെ സമരം ചെയ്യുന്നത്. അതിന് യുഡിഎഫ് പിന്തുണ കൊടുക്കുമെന്നും അദ്ദേഹം വ്യക്തമാക്കി. ഒരു ജാതി മത ശക്തികളുടെയും പിന്തുണ ആവശ്യമില്ലെന്നും അദ്ദേഹം പറഞ്ഞു.
