കണ്ണൂര്‍ താവക്കരയില്‍ ബൈക്കില്‍ കാറിടിച്ച് രണ്ടു പേര്‍ മരിച്ചു. എറണാകുളം പണിക്കശേരി വീട്ടില്‍ ഗൗതം കൃഷ്ണ (23), മൂക്കന്നൂര്‍ കാഞ്ഞിരത്തിങ്കല്‍ വീട്ടില്‍ ജിസ് ജോയ് (23) എന്നിവരാണ് മരിച്ചത്. ഇരുവരും സ്‌കൈപാലസ് ഹോട്ടല്‍ ജീവനക്കാരാണ്. ശനിയാഴ്ച രാത്രി 11.30-ഓടെ താവക്കര റോഡിലാണ് അപകടം.
ഭക്ഷണം കഴിച്ച് ബൈക്കില്‍ മടങ്ങുകയായിരുന്നു ഇരുവരും. എതിര്‍ദിശയില്‍നിന്നെത്തിയ കാറുമായി കൂട്ടിയിടിക്കുകയായിരുന്നു. അപകടത്തില്‍ റോഡിലേക്ക് തെറിച്ചുവീണ ഇരുവര്‍ക്കും ഗുരുതരമായി പരിക്കേറ്റു. എ.കെ.ജി. ആശുപത്രിയിലെത്തിച്ചെങ്കിലും ഇരുവരെയും രക്ഷിക്കാന്‍ കഴിഞ്ഞില്ല. മൃതദേഹം ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.