എറണാകുളം ഡി.സി.സി. ഓഫീസിന് മുന്നില്‍ പോസ്റ്റര്‍ പ്രചരിപ്പിച്ചതില്‍ പ്രതികരണവുമായി പ്രതിപക്ഷ നേതാവ് വി ഡി സതീശന്‍. പോസ്റ്റര്‍ പ്രചാരണം നടത്തുന്നത് പാര്‍ട്ടിയുടെ ശത്രുക്കളാണെന്നും ഏത് പാര്‍ട്ടി നേതാക്കളെ അപകീര്‍ത്തിപ്പെടുത്താന്‍ ശ്രമിച്ചാലും ശക്തമായ നടപടികളുണ്ടാകുമെന്നും വി ഡി സതീശന്‍ പറഞ്ഞു. പാര്‍ട്ടിയുടെ ശത്രുക്കളാണ് പോസ്റ്റര്‍ പ്രചാരണം നടത്തുന്നത്. വി ഡി സതീശന്റെയും കെ സുധാകരന്റെയും പേരില്‍ കേരളത്തില്‍ ഗ്രൂപ്പ് ഉണ്ടാകില്ലെന്നും പ്രതിപക്ഷനേതാവ് വ്യക്തമാക്കി.
വി.ഡി. സതീശന്‍ ഗ്രൂപ്പ് കളി അവസാനിപ്പിക്കണമെന്ന് ചൂണ്ടിക്കാട്ടി എറണാകുളം ഡി.സി.സി. ഓഫീസിന് മുന്നിലാണ് പ്രതിപക്ഷ നേതാവ് വി.ഡി. സതീശനെതിരെ പോസ്റ്റര്‍ പ്രതിഷേധം നടന്നത്. ഡി.സി.സി. അധ്യക്ഷ പട്ടിക സംബന്ധിച്ച ചര്‍ച്ചകള്‍ പുരോഗമിക്കവെയാണ് വി.ഡി. സതീശനെതിരേയും പോസ്റ്റര്‍ പ്രതിഷേധം.വി.ഡി. സതീശന്‍ കോണ്‍ഗ്രസ്സിനെ നശിപ്പിക്കുന്ന അഭിനവ തുഗ്ലക് ആണ്. സതീശന്റെ കോണ്‍ഗ്രസ് വഞ്ചനയും കള്ളക്കളിയും തിരിച്ചറിയുക. മുതിര്‍ന്ന നേതാക്കളെ അവഗണിക്കരുത് തുടങ്ങിയ മുന്നറിയിപ്പുമായാണ് പോസ്റ്റര്‍.